|
Carraa Keenya Ta'Emoo?
Taammanaa Bitimaa |
 |
Jarri ka'ee
Nuti kufuun
Inni boodaa hammeessee itti fufuun
Kunis
Sunis
Akka busaawaa nu adamsuun
Jirreenya hiree ofii
Ajjeefama hiree teenya
Kennaa Rabbii gochuun
Carraa keenya ta'emoo?
Dhallee akkaan guddifachuu
Horree akkaan galfachuu
Finnee homaa dhabuun
Iyyannee daddhabuun
Calleessinee namaa safaruun
Xiqqaa guddaa saanii gabbaruun
Kunis hireedha-moo
Carraa keenya ta'e-moo?
Mee lakkii
Ee lakkii
"Waaqni gurraachi garaa gurraachaa
Tokkichi maqaa dhibbaa"
Hundaa qixxee uumee
Birmadummaan shuumee!
Cufti qullaa
Garaa haadhatii baye
Hundi iyyaa
Dachee tana gaye
Marti talabuu ture
Culkii garaan qulqulluu
Ilaa booda barekaa
Gidiraa fi dhaanicha
Jallinaa fi saamicha!
Waaqaa magan
Namaa safuu
Gabrummaan kan garii
Bilisummaan kan kaanii
Maa maa maa
Maaf ta'aa?
Dukkanarraa dukkanatti dabruun
Cittoorratti fanxoon dabalamuun
Afaan majaatii ba'anii
Afaan yeeyyii bu'uun
Otoo daban goone
Tasa du'uun
Kunis milkii-dhamoo
Carraa keenya ta'emoo?
Isaan mataa keen! yarra taa'uun
Qoraasanii oliif gad nu ha'uun
Waawuu carraa keenyaa mitii
Lakkii waan uumamnefii mitii
Isaan nu bituuf hin dhalannee
Nutis isaanii bitamuuf hin qalkamnee
Nus, ee nus
Isaa-nis
Waaqatoo uumee
Birmadummaan shuumee!
Isaan namummaa keenya wallaalanii
Kunoo akka ganyaa nu takaalanii!
Nu: ee nu Oromoo
Hadiyyaa fi Sidaamoo
Kafichoo fi Kambaataa
Gambeelaa fi Walaayitaa
Kitila hoomaa kibbaa
Maaf jarri nu jibbaa?
Daangaa saanin dabarree
Handhuuraa saanin harree
Gaarran saanin qaarinee
Biyyaa isaan hin hariinee
Biyya saanittin duullee
Leeccalloo saanin guurree!
Gandeen saanittin dhufnee
Manneen saanin gubnee
Laggeen saanin seennee
Qoraan saanin cabsannee
Ulfa saanin cabsinee
Aadaa saanin madeessine-woo
Mirga saanin barbadeessine-woo
Maaf qe'um keenyatti
Maaf biyyum keenyatti
Akka baalaa harcaanaa
Waan namaan malle taanaa?
Buna keenya gabbarraa
Warqii keenya safarraa
Qabeenyi keenya dhaqee
Biyya saanii ijaraa
Beekumsi keenya! dhaqee
Manneen saanii jifaaraa
Keenya keenya hammaarrattuu
Kan ofiitin ijaarratuu
Keenya diiganiitoo
Teenya miidhaniitoo
Kan ofii hundeeffattuu
Barabaraan milkeeffatuu!
Qobaa ofii daddhabnaan
Jalkaattuu gaarii dhabnaan
Daboo gamaa waammatuu
Caalla caallaan dhaadatuu!
Caakkaa keenya guggubaa
Hoomaa keenya ukukkubaa
Aannanum keenya dhugaa
Gadadoo nutti dhuubaa!
Cooma dilbii murachaa
Daadhii booka unachaa
Galma keenyatti olgalee
Dargaggoo teenya qalee!
Namaaf safuu hin qabuu
Margaaf safuu hin qabuu
Bosona ciree nyaataa
Gatteettiin-saa waan dhabuu
Kilaashinkoo-dha baataa
Shimbirruu yoo barartee
Qubni qaataatti kaataa!
Sammuun waan biraa dhiisee
Waanuma qawwee yaadaa
Uggum yaa qawwee qawwee
Kan nutti taate jawwee!
Duris qawwee ibiddaa
Har'is qawwee ibiddaa
Isatoo nama iddaa
Jarri qawween as galee
Magartuu teenya qalee!
Ofiisaa Waaqa godhee
Nuuf du'a carraa godhee
Ejersa keenya muraa
Coqorsa keenya ciraa
Corqituu teenya diraa
Isaawoo jarris firaa!
Biyya gadaa dhiitaa
Saba gadaa dhiibaa
Galma jigsee onsaa
Lafa jiidhe gogsaa
Siiqqee-dha hurreessaa
Caaccuu-dha xureessaa!
Maasii garbuu gawweessaa
Baddaa-dhaa biyya keessaa
Caakkaa bunaas dhuunfatee
Aadaan sabaas huqqatee
Odaa keenya falaxaa
Kan itti nyaate cabsaa
Dhugaa goobane dabsaa
Yoom beekaree galataa?
Egaa hamma yoomitti
Egaa hanga hammamiitti
Kan dhiddhiit! amaa bullu
Kan sossodaachaa gallu
Akka gogorrii kan adamfamnu
Akka foonii kan waadamnu?
Hayyee dhagayi saba-koo
Hayyee oljedhi lammii-koo
Iyyi biyya biyya
Iyyi dachee tiyya
Iyyii iyya dabarsi
Yeeyyii si nyaattu marsi!
Ka'i kanniisa kiyya
Goondaa tuuta biyyaa
Biyyatoo gubatee
Harmee soqolamee
Abbilee dhaanamee
Coqorsa ciramee
Shamarree diramee
Olka'i uummata-koo
Wal-qabaddhuu deemi
Oljedhi saba-koo
Waliin tarkaanfaddhu
Irree-kee cimsaddhu
Wal-cinaa dhaabaddhu
Xiqqaa guddaa-kee waammaddhu
Iyyiitii labsaddhu
Tokkolleen maminii
Irraantaa abdaddhu!
Irraantaa abdaddhu
Falastiin gaafaddhu
Warra dhagaan loluu
Gabroomfataafoon toluu
Sirriitti iyyaafaddhu
Waan biraallee dhabdu
Waan guddaa daddhabdu
Qalbiin bira dhaabaddhu!
Dhagayi biyya-koo
Dhagayi uummata-koo
Tokkummaa-kee jabeessii
Gabrummaa barbadeessi!
Olka'ii harka walqabii deemi
Beenu-kaa deemi deemi
Galma bilisummaa seeni!
Barlin -o8. o4. o2
|
|