|
HUNDA SH IITOO KANNIISA
Taammanaa Bitimaa |
Maaloo as fidi qannoo
Sitoo hojjaan dammeessaa
Jeejee jigsee balleessaa
Roorroo kanas gabrummaa
Duubattaftiis hiyyummaa
Duguugee biyya keessaa!
Kanniifni baddaa labuu
Kan galma-saa dhaqqabuu
Waltayee dhalchi lachuu
Inni dammeessee galchuu!
Kanniifni gooroo fi dirree
Dhalchi lachuu walmirree
Ka'ee ofirraa kan faccisuu
Funyoo itti kaayamee
Kiyyoo ittaggaamamee
Ofirraa kan hanqisu!
Kanniifni gammoojjii sonuu
Utaalaa akka bosonuu
Inni kan badda-daree
Ilkee diinatti raree
Mirgasaaf itti-taree
Ilaakaa na mararee!
Kan roggee fi kan sululaa
Kan kaarran dhibban ulaa
Kan gaarran kan laggeenii
Yaabbattuu abbaa fardeenii!
Ijoolleen biyya abbaa-koo
Fiixaan baaftuun galma-koo
Jabbileen Oromiyaa
Hunda shiitoo kanniisaa
Kam faarsetan kam dhiisaa?
Ijoolleen kaabaa-kibbaa
Hundashii roorroo jibbaa
Gichilleen bahaa-lixaa
Hundashiitoo ittilixaa
Ittilixee cagadaa
Akka mishingaa agadaa!
Ijoolleen wiirtuu biyyaa
Handhuurri qaama kiyyaa
Hundashii ka'ee iyyaa
Iyyee iyya dabarsaa
Nama gorraatuu marsaa!
Ijoolleen biyya abbaa-koo
Fiixaan baaftuun galma-koo
Kunoo itti-kaatekaa
Waltarreen gayyaatekaa
Asiin achiinis mirree
Qabsoo birmaduu dirree
Akka jagnootaa durii
Akka gamnoota durii
Barraaqaan manaa baatee
Kittimaaf gadiyaate!
Ijoollee baddaa Harargee
Duruu bowwaattan argee
Jabbilee baddaan jimaa
Bayeen goorroottii simaa!
Gichilloonni Barantuu
Yoo shaggooyyee ragadduu
Oggaa diina cagadduu
Akka nama marartuu!
Qeerransoo lameen Arsii
Warra abbaa diina marsii
Ijoollee baddaa Baalee
Harqituu akka Salaalee
Qabsoon keewoo bakkalchaa
Wantaan keewoo kallachaa
Maaliif jarri wallaalee
Ammasoo si takaalee!
Goodaa aannan galaanuu
Baddaa leenci caraanuu
Baale-Arsii Diida'aa
Seenaa dheeraa-woo qabdaa
Kam dhiiseen kam ida'aa?
Yaa qeerransoota Gujii
Warra aadaan-saa gujjii
Yaa jibbilee Booranaa
Yeroon keenya yoonanaa
Ijoollee caffee gadaa
Warra gaaddifni odaa
Booranni nu eebbisee
Dhuudhaa nutti deebisee
Maaf jarri nu cagadaa?
Leenchota Tuulam-Maccaa
Ijoollee goodaan manyaa
Jarroo sitti ta'ee maggaanyaa
Jabbilee baddaan garbuu
Tokkummaan ka'an malee
Waanjoo acha'an malee
Gabrummaan kun hin dabruu!
Gaafa dubbiin dhuftee
Kilaashiin tashattashtii
Gaafa xiiqiin fuftee
Shimalaan shakasshaktii
Yaa warra abbaa shimalaa
Ammas isas siif malaa!
Hamaaqexoota Jimmaa
Warra abbaa seenaa cimaa
Uumee caakkaan-saa bunaa
Waanjoo kana darbannaan
Walabummaa argannaan
Biyyi keenya nagumaa!
Bowwaafoo Gibee jiraa
Namaafoo namni jiraa
Roorrisaan gaaraa dhufee
Gabrummaa itti-fufee
Maaf akkana nu diraa?
Kanniisoo Iluubbaa Booraa
Dheddheeroo argaan Shoolaa
Warra bosonni shaayii
Silaawoo boora qabuu
Oljennaan maalum dhaabuu
Mee eeboo harka kaayi!
Yaa magaallan Wallaggaa
An dhufeetan sin argaa
Warra oddoon hancootee
Lookoowwan maqaan Jootee
Garaan koo isin abjootee!
Jabbilee tiruu Leeqaa
Hundatoo isin faarsaa
Maqaan keessanoo meeqaa?
Yaa jabbilee Wambaraa
Gamas dhufeen sin baraa
Yoo biyyaa baldhaa qabduu
Yoo lammiis gobbuu qabduu
Bilisummaa maaf dhabduu?
Ijoollee baddaa Walloo
Koodeewwan Afran Qalloo
Warra seenaan baballoo
Oromoon keewoo galaanaa
Jarri kun maaf si dhaanaa?
Yaa gichilloota Raayyaa
Ilmaan aabboo kan aayyaa
Mee ammas akkum durii
Karaa gaaraa nu furii!
Ijoolleen biyya abbaa-koo
Fiixaan baaftuun faajjii-too
Gaaraa dakaa waltaatee
Walabummaaf gayyaatee
Gayyaatee ukukkubdee
Gabrummaa ukunkurtee
Alaabaa nyaaphaa dagattee
Kanshii samiitti olqabattee
Walabummaan kakattee
Bilisummaaf dhaadattii
Lammii-shii hunda waammattii
Inj ifannoon-shii hin ooluu
Jarris dandayee hin qoluu
Hayaa, haa deemtukaa waltarree
Akka Hamtuun ishii hin agarree!
Gichilleen biyya abbaa-koo
Abdiin boruu axaan-too
Haa deemtukaa xuruurtee
Galma mana abbaa gadaa
Gaaddisaa cimaa odaa
Haa seentukaa kunuuntee
Jaarsi biyy! aa eebbisi
Jaartiin biyyaas eebbisi
Waaqnis ittaa-dabaluu
Kan garaan keenya abbaluu!
Ijoolleen biyya abbaa-koo
Kanniisoleen lammiin-too
Manaa-alaa walta'aa
Bilisummaaf olka'aa
Waanjoo gabrummaa ha'aa!
Achi ha'aatii caccabsaa
Caccabsaatii darbaddhaa
Mirgin hafuu ab daddhaa!
Galma mana abbaa gadaa
Gaaddisa guddicha odaa
Gonfaatii hundeeffaddhaa
Ilaafi-laamee gadaa
Ammas bu'ureeffaddha!
Jabeessaa akka ejersaa
Dheeressaa akka birbirsaa
Hundeen gadaa fagaatuu
Seenaa duris akka baatuu!
Barliin, 26. 03. 06
* HUBACHIISA: Kunoo gara waggaawwan sadiitii kaasee ijoolleen Oromoo qabsoo bilisummaa saba keenyaa gabbisaa jirti. Kana irratti gariin duutee, gariin hidhamtee dararamaa yoo jirtu, kaan biyya ofii gadi-dhiiftee bineensummaa gita-bittee Habashaa yoo baqattu, kuun immoo bakki ishiin buute hamma ammaattuu hin beekamne. Ammoo, kun hundumtuu qabsoo ijoollee biyya gadaa homaa duubatti deebsuu hin dandeenyee, kunoo matumaa qabsoo ganamaan kaateef san daran itti cimsaatoo jirti. Walaloon, yeedaloo geerrarsaatiin walaleeffame kun: ijoollee Oromoo fi Oromiyaa kan haarsaa taateef yaadannoo, kan mana hidhaa jirtuuf jajjabeessii fi biradhaabannoo, kan ammallee dirree qabsoo irra jirtuuf immoo mararfannoo fi raajeffannoo haa tahu!