|
QUBEE TOO
Taammanaa Bitimaa |
Quba koo
Quba koo
Qaama koo
Qaama ilmoo namaa
Jarroo mummuruuf gamaa!
Ee, jarri
Ee, Jarri
Warri gararraan dhufe!
Jara oftuulummaan
Moora ijaa cufe!
Jarri maqaan qawwee
Warri abbaa qawwee
Sitti ta'ekaa jawwee
Si liqmsuufoo gamaa
Hamaa hamaan namaa!
Qubee too
Quba koo
Atoo daangaa saaniin dabarree
Oobruu saanitti waa hin harree
Laga saaniin ceenee
Qoraan saaniin cabsannee!
Mooraa saaniin lindhee
Horii saaniin yaafannee
Caffee saaniittin dhufnee
Odaa saaniin mummurree
Qeyee saaniin dhaqnee
Birmaduu saaniin gurgurree
Maalif sitti gamaa
Jarri garaan hamaa?
Qubee too
Quba koo
Sitti ka'ekaa jarri
Jibbituun kee warri!
Sheexanasaa waammatee
Jinnii daboo kadhatee
Si barbadeessuuf gamaa
Gidiramaan namaa!
Nattimi qubee too
Odeessi lubbuu too
Akkuma xibaaramu san
Akkuma ololamu san
Maddi kee Oroppaa dhaa?
Gandi kee Xaaliyaa dhaa?
Hayaa, qubee too
Meeyaa, faajjii too
Abbaan seenaa qubasaa haa mirmirsu
Abbaan seeraa alangeesaa haa mirqisu:
Biyyi haa yaa'u
Sabni haa ka'u
Waayee tee wal-haa gaggaafatu
Hundee kee wal-haa iyyaafatu!
Qorataan Gibxii haa deemu
Quwataan Iraaq haa seenu
Fara'oota haa dammaqsu
Baabiloonota haa lallabsu
Waayee tee haa qoratu
Dharasaa haa qolatu!
Faana kee haa dadhwu
Misirii fi Baabiloon
Foneeshiyaa-Libaanon
Giriikii fi Roomaa haa gawu
Ilaa dhugaan ifattaa bawu!
Qubee too
Quba koo
Ilmaan Kuush walitti qabi
Bakka yaaddesoo qaqqabi
Abbayya ta'ii gannaa bona galaani
Leenca ta'ii oggaa mara caraani!
Somaalee fi Oromoon
Afaari fi Kafichoon
Hadiyyaa fi Sidaamoon
Walaayitaa fi Gede'oon
Gaaraa dakaa si waammatee
Kunookaa si hammatee
Akka mucaa si urursaa
Akka jagnaa si faarsaa
Hortee Kuushiif bakkalcha ta'ii
Ifaan doofummaa achi ha'i!
Qubee too
Quba koo
Oljedhiitii deemi
Lafa dhugaa seeni! :
Galma abbaa muudaa
Masqiida xinnaa-guddaa
Bataskaana hundaa
Galii bakka kee qabaddhu
Mirga kee dhuunfaddhu!
Qeesiin siin haa qaddasu
Sheekiin siin haa tallasu
Qaalluun siin haa jeekkaru
Gamni siin haa geerraru
Jagni siin haa dhaadatu
Cufti si haa waammatu
Sabni siif haa dhaabatu!
Biyyi siin haa dhaabbatu!
Qubee too
Quba koo
Dachee gadaa keessatti
Caffee odaa irratti
Coqorsa ta'ii lafa keessa loyi
Hiddii ta'ii gannaa bona lalisi
Akka baqqala faajjii asxaa Oromoo ta'i
Akka geeda odaa gaaddisa sabaaf ta'i!
Ejersa ta'ii cufti si haa dhaabbatuu
Aannan ta'ii hundi si haa jaalatuu
Akka dammaa sabatti mi'aawi
Akka sorsaa biyyatti urgaayi
Akka gonfaa namatti miidhagi
Akka garbuu angafoomi
Akka bunaa eebbifami
Akka fardaa Oromoon si haa leellisuu
Akka sa'aa Waaqni si haa eebbisuu
Bilisummaa fi misoomaan ija keenya babbani
Happhee ta'ii dachee Oromiyaatti maxxani!
Barliin, Bona 1994
*** Hubachiisa: Yeroon walaloon kun walaleeffame, yeroo nafxanyoonni qubee teenya irratti duula hamaa oofaa turani. Yeroo sana kan biraa hafee qeesonni Habashaa dubartii Oromoo takka tan qubee barattee barsiiftuyyu, duunaan bataskaana keessatti awwaaluu ennaa didani. Dabaleesoo, walaloon kun kora Waldaa Qorannoo Oromoo (OSA) isa bara 1999 keessa Atlaantaatti (USA) taye irratti, kan uummataaf dubbifame.